იცოდით, რომ ორიოდე დღის წინ გამოცხადდა საქართველოს ისტორიაში ყველაზე მსხვილი ელექტრონული ტენდერი, რომელიც ეხება ბათუმში სპორტული კომპლექსის მშენებლობას? გამომდინარე იქედან, რომ აღნიშნული ტენდერი გარკვეულ ნომინაციებში რეკორდსმენია, გვსურს გავამახვილოთ ყურადღება რამდენიმე საინტერესო ფაქტზე — ყოველ შემთხვევაში ჩვენთვის, როგორც სპორტისა და შესყიდვების მოყვარულებისთვის. 🙂

ყველა ქვემოთ მოყვანილი ინფორმაციის წყაროს წარმოადგენს სახელმწიფო შესყიდვების ერთიანი ელექტრონული სისტემა.

კომპლექსის საერთო ფართი შეადგენს 23 000 კვადრატულ მეტრზე ცოტა მეტს. მაქსიმალური სიმაღლე ნოლის საპროექტო ნიშნულიდან შეადგენს 37 მეტრს — რაც, უხეში დაანგარიშებით, დაახლოებით 12-სართულიანი კორპუსის სიმაღლეს მაინც უნდა აღწევდეს.

კომპლექსში გათვალისწინებულია:
— სამაყურებლო ტრიბუნა 3 406 სტუმარზე
— უნივერსალური დარბაზი სპორტული ტანვარჯიშის, ჭიდაობის, საბრძოლო ხელოვნების, კრივის და სხვა სახეობებისთვის
— ლიფტები, პარკირების ადგილები და სხვა დამხმარე კონსტრუქციები

კომპლექსის მშენებლობა ფინანსდება აჭარის ავტონომიური რესპუბლიკის ბიუჯეტით. მშენებლობის სავარაუდო ღირებულება შეადგენს 66 574 430 ლარს — საქართველოს ისტორიაში ყველაზე მსხვილი ელექტრონული ტენდერის რეკორდული თანხა.

აღნიშნული ტენდერი თავდაპირველად გამოცხადდა ღია პროცედურის სახით (ერთი კონვერტის პრინციპით), თუმცა მალევე შეწყდა. რის შემდეგაც გამოცხადდა და ამჟამად მიმდინარეობს რევერსული აუქციონის ტიპის ტენდერი.

რევერსულ აუქციონში შემსყიდველი ორგანიზაცია სავალდებულოდ განსაზღვრავს კლების ბიჯს სავარაუდო ღირებულების 0.4-დან 2%-მდე ფარგლებში. ამ ტენდერში შემსყიდველმა შეარჩია დაახლოებით 0.45% — რაც 300 000 ლარის კლების ბიჯს შეესაბამება.

ტენდერი მიმდინარეობს 23 კალენდარული დღე. სატენდერო დოკუმენტაცია მოიცავს ტენდერის ხარჯთაღრიცხვას PDF ფაილის სახით, რომელიც 178 გვერდს შეიცავს.

სატენდერო დოკუმენტაციის პირობების თანახმად, საერთაშორისო სტანდარტების შესაბამისი კომპლექსი უნდა გვქონდეს 11 თვეში — ხელშეკრულების გაფორმებიდან.

გამარჯვებულ მიმწოდებელს (ან ამხანაგობას) უნდა გააჩნდეს საკმაოდ მაღალი რესურსი. დოკუმენტაციის თანახმად, პრეტენდენტს 2014 წლის 1 იანვრიდან 2017 წლის 1 ივლისამდე პერიოდში შესრულებული უნდა ჰქონდეს სამშენებლო სამუშაოები (გარდა დემონტაჟის, რეკონსტრუქციის, რეაბილიტაციის და შეკეთების სამუშაოებისა) არანაკლებ 150 000 000 ლარის ოდენობით.

გამარჯვებულს დაეკისრება საგარანტიო ვალდებულებები. ყველაზე ხანგრძლივი გარანტია მოთხოვნილია ძირითად კონსტრუქციულ სისტემებზე — 50 წელი.

გსურთ იყოთ განახლებული საჯარო და კომერციული შესყიდვების სიახლეების შესახებ? გაწევრიანდით Etenders.ge-ს Facebook ჯგუფში და მიიღეთ უახლესი ინფორმაცია შესყიდვების სფეროში. გჭირდებათ კონსულტაცია? დაგვიკავშირდით!

სტატიის ავტორი: ალექსანდრე ჩხიკვიშვილი