იცოდით, რომ შესყიდვებში ხშირად გამოყენებადი ტერმინები - RFI, EOI, RFP, RFT და RFQ განსხვავებულ შინაარსს ატარებს?
მიუხედავად განსხვავებული შინაარსისა, პრაქტიკაში ეს ტერმინები ზოგჯერ სინონიმების სახით გამოიყენება, რამაც შესაძლებელია პოტენციურ მიმწოდებლებში შექმნას გარკვეული დაბნეულობა და საბოლოო ჯამში მწირი გამოხმაურება გამოიწვიოს.
ზემოაღნიშნულიდან გამომდინარე, წინამდებარე მოკლე სტატიაში, შევეცდებით, შეძლებისდაგვარად მოკლედ აღვწეროთ, თუ რას გულისხმობს შესყიდვების ლიტერატურა ზემოაღნიშნულ ტერმინებში და რაში მდგომარეობს ძირითადი განსხვავება.
RFI - (Request for Information) ითარგმნება, როგორც განხცადება ინფორმაციის მიწოდების შესახებ და როგორც წესი, გამოიყენება მაშინ, როდესაც შემსყიდველმა ორგანიზაციამ იცის თუ რა შედეგი უნდა იქნას მიღწეული შესყიდვის შედეგად, თუმცა მას სჭირდება მეტი ინფორმაცია ტექნიკური დავალების, სპეციფიკაციებისა თუ სხვა მოთხოვნების ჩამოყალიბებისათვის. შესაბამისად, RFI-ს მიზანს, შესაბამის მიწოდების ბაზარზე ოპერირებადი მიმწოდებლებისაგან შესყიდვის შემდგომი ეტაპისათვის საჭირო ინფორმაციის შეგროვება წარმოადგენს. ამასთან, ფოკუსირება შესაძლებელია კეთდებოდეს, მაგალითად, საჭიროების დაკმაყოფილების ალტერნატიული პროდუქტების/სერვისების ხელთარსებობის კვლევაზე, მიმწოდებელთა შესაძლებლობების შესწავლაზე და ა.შ. ყოველივე ზემოაღნიშნულიდან გამომდინარე, RFI-ის შედეგს არ წარმოადგენს ხელშეკრულება შესყიდვის შესახებ. როგორც წესი, RFI (გამოყენების შემთხვევაში) შესყიდვის მთლიანი პროცედურის მხოლოდ და მხოლოდ საწყისი ეტაპია და გამოიყენება წინამდებარე მოკლე სტატიაში განხილულ სხვა პროცედურებთან (RFP, RFT ან RFQ) კომბინაციაში.
EOI (An Expression of Interest) ან ROI (Registration of Interest), ქართულ ენაზე, ხშირად „ინტერესთა გამოხატვის“ ტერმინით მოიხსენიება და გამოიყენება პრაქტიკულად იგივე მიდგომით, რაც RFI. შემსყიდველ კომპანიას, რომელიც იყენებს EOI-ს, როგორც წესი, სურს მიწოდების ბაზრის შესაძლებლობების შესახებ ინფორმაციის შეგროვება, შესყიდვის შემდგომი ნაბიჯების ინიცირებისათვის. ასევე შესაძლებელია, რომ EOI მიმწოდებელთა პრეკვალიფიკაციისათვის და ეგრედწოდებული მიმწოდენბელთა „მოკლე სიის“ შექმნისათვის იყოს გამოყენებული. ისევე, როგორც RFI-ს შემთხვევაში, მცირეა იმის ალბათობა, რომ EOI-ს ჩატარების შედეგად მიმწოდებელთან გაფორმდეს ხელშეკრულება შესყიდვის ობიექტის მიწოდების შესახებ.
RFP (A Request For Proposal) ითარგმნება, როგორც შემსყიდველი ორგანიზაციის განცხადება შეთავაზებების/წინადადებების მიწოდების შესახებ. როგორც წესი, შესყიდვის პროცედურას ეძლევა აღნიშნული სახელწოდება, როდესაც შემსყიდველი ორგანიზაციის საჭიროება აღწერილია (ზოგადი) კონცეფტუალური პროექტით ან ეგრეთწოდებული ფუნქციური და შედეგზე ორიენტირებული სპეციფიკაციებით, შედეგის მიღწევის კონკრეტული გზის (დეტალური ტექნიკური სპეციფიკაციების) მითითების გარეშე. შესაბამისად, მიმწოდებლებს ეძლევათ საჭიროების დაკმაყოფილების განსხვავებული ალტერნატივების შეთავაზების საშუალება, რომელთაგან შემსყიდველი ორგანიზაცია ახორციელებს საუკეთესო გადაწყვეტილების შერჩევას.
RFT (A Request For Tender) ითარგმნება, როგორც შემსყიდველი ორგანიზაციის განცხადება „სატენდერო“ წინადადებების მიწოდების შესახებ. როგორც წესი, შესყიდვის პროცედურას ეძლევა აღნიშნული სახელწოდება, როდესაც შემსყიდველ ორგანიზაციას შერჩეული აქვს საჭიროების დაკმაყოფილების კონკრეტული ალტერნატივა. ამასთან, შერჩეული ალტერნატივა აღწერილია დეტალური სპეციფიკაციების საშუალებით, ხოლო საუკეთესო წინადადების შერჩევისათვის შემსყიდველი ორგანიზაცია იყენებს როგორც ფასს, ასევე ხარისხობრივ კრიტერიუმებს/ფაქტორებს.
RFQ-ს (A Request For Quote) თარგმანია ფასთა კოტირება. როგორც წესი, აღნიშნული სახელწოდება ტენდერს ენიჭება მაშინ, როდესაც გამარჯვებულის გამოვლენის ძირითად ფაქტორს სატენდერო წინადადების ფასი წარმოადგენს. ისევე როგორც RFT-ს შემთხვევაში, შემსყიდველ ორგანიზაციას საჭიროა შერჩეული ჰქონდეს საჭიროების დაკმაყოფილების კონკრეტული ალტერნატივა, რომელიც აღწერილია დეტალური სპეციფიკაციების საშუალებით. როგორც წესი, გამარჯვებულად ვლინდება ტენდერის ის მონაწილე, რომელიც აკმაყოფილებს ყველა სატენდერო პირობას საუკეთესო ფასად.
