შესყიდვების სისტემის ინსტრუქციები / ხშირად დასმული კითხვები




როგორ შეგვიძლია გამოვიყენოთ Etenders.ge-ს შესყიდვების ელექტრონული სისტემა?

Etenders.ge-ს შესყიდვების ელექტრონული სისტემა დაგეხმარებით მაშინ, როდესაც თქვენ ეძებთ ბიზნეს პარტნიორს, რომლისგანაც განახორციელებთ პროდუქციის/მომსახურების ერთ ან მრავალჯერად შესყიდვას.

შესყიდვის პროცესი Etenders.ge-ზე იწყება იმით, რომ თქვენს მიერ შესყიდვების ელექტრონულ სიტემაში იდება შესაბამისი სატენდერო განაცხადი, რომლის გამოქვეყნებისთანავე Etenders.ge ატყობინებს შესაბამის სფეროში მოღვაწე კომპანიებს თქვენი განაცხადის შესახებ. ზემოაღნიშნულ ქმედებებზე საპასუხოდ, დაინტერესებული კომპანიები მოგაწვდიან წინადადებებს, რომელთაგან თქვენს მიერ განხორციელდება თქვენთვის ოპტიმალურის შერჩევა და ხელშეკრულების გაფორმების პროცესის ინიცირება.

ბუნებრივია, თქვენი განაცხადი საჭიროა აღწერდეს, თუ რა ტიპის ბიზნეს პარტნიორს ეძებთ ან რა პროდუქციის/მომსახურების შესყიდვა გსურთ. რაც უფრო დეტალურია თქვენი სპეციფიკაციები, მით უფრო დიდია იმის ალბათობა, რომ შემოთავაზებული წინადადებები ზუსტად მოდიოდეს შესაბამისობაში თქვენს საჭიროებასთან.

სატენდერო განაცხადის Etenders.ge-ზე განთავსებისათვის, საჭიროა, რომ თქვენ შეხვიდეთ სისტემაში თქვენი ელექტრონული ფოსტის და პაროლის მითითებით, დააჭიროთ ღილაკს „შესყიდვის გამოცხადება“ და მიჰყვეთ სისტემაში ინტეგრირებულ სტანდარტულ ველებს, რომელთანაც ასევე განთავსებულია ველის გამოყენების მოკლე ინსტრუქცია.
 
ტენდერის ტიპის (შესყიდვის საშუალების) სწორად შერჩევისათვის, გთხოვთ, იხილოთ ქვემოთ მოყვანილი განმარტებები სისტემაში ინტეგრირებულ ტენდერის ტიპებთან დაკავშირებით.

იმ შემთხვევაში თუ თქვენ ჯერ არ ხართ რეგისტრირებული Etenders.ge-ზე, გთხოვთ გაიაროთ უფასო რეგისტრაცია.


რა ტიპის ტენდერი შეგვიძლია გამოვაცხადოთ Etenders.ge-ზე?

ტენდერის ტიპის სწორად შერჩევა დამოკიდებულია რიგ ფაქტორებზე, მათ შორის, შესყიდვის ობიექტზე, გასაფორმებელი ხელშეკრულების ტიპზე და თქვენს კომპანიაში დანერგილ შესყიდვის ჩატარების წესებზე. გამომდინარე განსხვავებული საჭიროებებიდან, Etenders.ge მაქსიმალურად მოქნილია. ჩვენს სისტემაში ინტეგრირებულია განსხვავებული ტიპის ტენდერი და შესყიდვის პროცედურა. ქვემოთ მოყვანილია ჩვენი პროცედურების მოკლე აღწერა: 

• განცხადების გამოქვეყნებისას, თქვენი სატენდერო განაცხადი თავსდება Etenders.ge-ს ელექტრონულ სისტემაში, ხოლო წინადადებების მიღება ხორცილდება Etenders.ge-ს გვერდის ავლით -  მაგალითად, სავსებით შესაძლებელია, რომ თქვენ გსურდეთ შეთავაზებების მიღება ქაღალდის ფორმით ან ელექტრონული ფოსტის თუ ტელეფონის საშუალებით.

განცხადებისგან განსხვავებით, Etenders.ge-ზე ინტეგრირებული ელექტრონული პროცედურები,  გულისხმობენ არა მხოლოდ სატენდერო განაცხადის Etenders.ge-ზე გამოქვეყნებას, არამედ i) თქვენი პოტენციური ბიზნეს პარტნიორების მხრიდან წინადადებების ელექტრონულად, სისტემის გამოყენებით წარდგენას (eSubmission), ii) წინადადებების წარდგენის შემდგომი კომუნიკაციის სისტემურად წარმოებას (მაგალითად, წინადადებების დაზუსტების ეტაპზე) და iii) ტენდერთან დაკავშირებული, სისტემაში ატვირთული დოკუმენტაციის Etenders.ge-ზე ხუთი წლის ვადით არქივირებას (რაც, ხშირ შემთხვევაში, კომპანიაში გამოიყენება ანგარიშგების მიზნებისათვის). 

გარდა ზემოაღნიშნულისა, ტენდერისათვის დამახასიათებელი ზოგიერთი პროცესი შეუძლებელია წარმართულ იქნას ელექტრონული პროცედურის გამოყენების გარეშე - მაგალითად, პრეტენდენტებს შორის ელექტრონული ვაჭრობა შეუძლებელია განცხადების შემთხვევაში და ამისთვის საჭიროა ეგრეთწოდებული რევერსული აუქციონის ჩატარება; წინადადებების ელექტრონული ფორმით მიღება მნიშვნელოვნად უმარტივებს მონაწილეობას უცხოურ კომპანიას.

Etenders.ge-ზე ინტეგრირებულია შემდეგი ტიპის ელექტრონული პროცედურები:
• რევერსული აუქციონი წარმოადგენს პროცედურას, რომლის ფარგლებშიც პოტენციურ მიმწოდებლებს შორის იმართება ელექტრონული ვაჭრობა – მიმწოდებლები ონლაინ რეჟიმში აკლებენ ფასებს და კლებადობის პრინციპით ვაჭრობენ ერთმანეთთან.

ჩვენს სისტემაში ჩაშენებულია ე.წ. ინგლისური ტიპის რევერსული აუქციონი, რომელიც ფუნქციონირებს შემდეგნაირად: პრეტენდენტები წარადგენენ მათ სატენდერო წინადადებებს Etenders.ge–ს საშუალებით რევერსული აუქციონის მსვლელობის ეტაპზე „წინადადებების მიღება დაწყებულია“. შემსყიდველი ორგანიზაციის მიერ წინასწარ განსაზღვრულ დროს მთავრდება წინადადებების მიღება და იწყება ელექტრონული ვაჭრობის ეტაპი „მიმდინარეობს ვაჭრობა“. აღნიშნული ეტაპის საწყისი ხანგრძლივობა შეადგენს 15 წუთს, ხოლო მსვლელობის უკანასკნელი ორი წუთის განმავლობაში აუქციონის დარჩენილი დრო გახანგრძლივდება და დაბრუნდება ორ წუთზე, იმ შემთხვევაში თუ ონლაინ ვაჭრობის შედეგად პრეტენდენტების რიგითობა შეიცვლება (თუ რომელიმე პრეტენდენტი ფასის კლების შედეგად დააფიქსირებს მის რომელიმე კონკურენტზე დაბალ ან ტოლ ფასს). აუქციონის მსვლელობისას, შესაძლებელია როგორც კონკურენტზე დაბალი, ასევე მაღალი ფასის დაფიქსირება.

როგორც წესი, რევერსული აუქციონი გამოიყენება მაშინ, როდესაც შემსყიდველი ორგანიზაცია დეტალურად აღწერს შესყიდვის ობიექტს და, შესაბამისად, პოტენციურ მიმწოდებლებს შორის წარიმართება ფასით ვაჭრობა, მსგავსი/ეკვივალენტური პროდუქციის/მომსახურების შეთავაზების ფარგლებში.

• ღია ტენდერი ერთი კონვერტის პრინციპით გულისხმობს თქვენი სატენდერო განაცხადით დაინტერესებული მიმწოდებლების მხრიდან წინადადებების წარდგენას ერთიანად, ეგრეთწოდებული ერთი „ელექტრონული კონვერტით“, ფაილების Etenders.ge-ზე ატვირთვით. 

როგორც წესი, ეს არის სტანდარტული შემთხვევა, როდესაც შემსყიდველი ორგანიზაციის წარმომადგენლები არ არიან ვალდებულები, შეაფასონ ტექნიკური წინადადებები ფინანსური წინადადებების ცოდნის გარეშე. შესაბამისად, თუ თქვენ აცხადებთ ტენდერს ერთი კონვერტის პრინციპით, მიმწოდებლის მიერ Etenders.ge-ზე ატვირთული როგორც ტექნიკური (მაგალითად, შემოთავაზებული ობიექტის ტექნიკური პარამეტრები), ასევე ფინანსური წინადადება (მაგალითად, ხარჯთაღრიცხვა) ხდება თქვენთვის ერთიანად ხელმისაწვდომი/ხილვადი თქვენი ელექტრონული ტენდერის შედეგების ველში, როგორც კი დასრულდება წინადადებების წარდგენისათვის განსაზღვრული დრო.

• ღია ტენდერი ორი კონვერტის პრინციპით, გამოიყენება, უპირველეს ყოვლისა, მაშინ, როდესაც შემსყიდველი ორგანიზაცია (შიდაორგანიზაციული წესებით) ვალდებულია, ჯერ შეაფასოს ტექნიკური წინადადებები (ფასების ცოდნის გარეშე), ხოლო შემდეგ გაითვალისწინოს ფინანსური წინადადებები ეკონომიკურად ყველაზე მომგებიანი წინადადების შერჩევისათვის. 

როგორც წესი, აღნიშნულ პროცედურას იყენებენ საერთაშორისო ორგანიზაციები (ორგანიზაციებში მოქმედი წესებიდან გამომდინარე), ან როდესაც შესყიდვა ხორციელდება საერთაშორისო საფინანსო ორგანიზაციების სახსრებით და როდესაც შემსყიდველი ორგანიზაცია ვალდებულია დაიცვას ამა თუ იმ საერთაშორისო საფინანსო ორგანიზაციის შესყიდვების პროცედურებთან დაკავშირებული წესები. 

• პრეკვალიფიკაციის მოდული გაძლევთ საშუალებას, მოახდინოთ კვალიფიციური მიმწოდებლების შერჩევა, მათთვის შესყიდვის პროცესის შემდგომი ეტაპის წარმართვისათვის. პრეკვალიფიკაციის შემდგომ ეტაპს, როგორც წესი, განეკუთვნება (ერთი, ან რამდენიმე) შეზღუდული პროცედურის ტიპის ტენდერი.

შეზღუდული პროცედურის სახით თქვენ შეგიძლიათ გამოაცხადოთ როგორც რევერსული აუქციონი, ასევე ტენდერი ერთი კონვერტის პრინციპით და ტენდერი ორი კონვერტის პრინციპით. შეზღუდული პროცედურის შემთხვევაში, წინადადებების წარდგენის საშუალება ეძლევათ მხოლოდ თქვენს მიერ წინასწარ შერჩეულ (პრეკვალიფიცირებულ) მიმწოდებლებს.

ტექნიკურად, შეზღუდული პროცედურის ჩვენს სისტემაში გამოცხადება ხდება შემდეგნაირად: ნებისმიერი ტიპის ელექტრონული ტენდერის გამოცხადებისას, სისტემის შესაბამისი ველების საშუალებით, თქვენ ახდენთ იმ მიმწოდებლების მონიშვნას,  რომელთაც სისტემა მისცემს წვდომას თქვენი ტენდერის დეტალებზე და მისცემს წინადადებების წარდგენის საშუალებას. წინაპირობას განეკუთვნება მხოლოდ ის, რომ პრეტენდენტი, რომელსაც მიეცემა შეზღუდულ პროცედურაში მონაწილეობის უფლება, საჭიროა იყოს რეგისტრირებული Etenders.ge-ზე.

შეზღუდული პროცედურის ანალოგიურად, Etenders.ge-ს ერთ-ერთ ოპციას წარმოადგენს ანონიმური ტენდერი, რომლის დროსაც შემსყიდველ ორგანიზაციას (გარკვეული მიზეზების გამო) არ სურს, რომ პრეტენდენტებმა დაინახონ მისი, როგორ შემსყიდველი ორგანიზაციის ვინაობა. აღნიშნული ფუნქცია ხელმისაწვდომია შესაბამისი ელექტრონული ტენდერის გამოცხადებისას. გთხოვთ გაითვალისწინოთ, რომ თქვენი ვინაობა სისტემაში გაიხსნება მხოლოდ იმ კომპანიებისათვის, რომლებმაც მონაწილეობა მიიღეს თქვენს მიერ გამოცხადებულ ანონიმურ ტენდერში, მას მერე რაც დასრულდება ტენდერის მიმდინარეობა. 



რა ტიპის კონტრაქტების გაფორმება შეგვიძლია სისტემაში ინტეგრირებული სატენდერო პროცედურებით?

Etenders.ge-ზე ინტეგრირებული ტენდერის ტიპების გამოყენებით თქვენ გაქვთ შესაძლებლობა გააფორმოთ ხელშეკრულებები როგორც ერთჯერადი ასევე მრავალჯერადი (განმეორებითი) მიწოდებ(ებ)ის შესახებ.

მაგალითად, თუ თქვენ გეგმავთ ერთჯერადად შეისყიდოთ გარკვეული პროდუქცია, ან ფიქრობთ, შეარჩიოთ მხოლოდ ერთი კომპანია პერიოდული მიწოდებებისათვის, მაშინ, იდეალურ შემთხვევაში, საკმარისია Etenders.ge-ზე ერთად-ერთი ტენდერის გამოცხადება, რომლის საშუალებითაც თქვენ მიიღებთ დაინტერესებული კომპანიების წინადადებებს. წარდგენილი წინადადებებიდან თქვენ შეარჩევთ საუკეთესოს ერთჯერადი მოწოდების შესახებ ხელშეკრულების გასაფორმებლად.

წარმოსადგენია ასევე გარემოება, როდესაც თქვენ გსურთ წინასწარ შეარჩიოთ რამდენიმე კვალიფიციური მიმწოდებელი კომპანია (პრეკვალიფიკაციის ჩატარებით), ხოლო მოგვიანებით განახორციელოთ კონკრეტული შესყიდვა (პრეკვალიფიცირებულებს შორის) იმ კომპანიისაგან, რომელიც, მოგვიანებით, შესყიდვის განხორციელებისას წარმოადგენს საუკეთესო პირობებს (მაგალითად ფასს). ასეთ შემთხვევაში, პიველ ეტაპზე, თქვენ შეგიძლიათ გამოიყენოთ პრეკვალიფიკაციის მოდული კვალიფიციური და სანდო კომპანიების წინასწარი შერჩევის მიზნით. შესყიდვის საჭიროების დადგომისას, თქვენს შეგიძლიათ გამოუცხადოთ პრეკვალიფიცირებულ მიმწოდებლებს ეგრეთწოდებული call off პროცედურა, რომელიც გამოავლენს პრეკვალიფიცირებულებს შორის საუკეთესოს. ჩვენს სისტემაში, call off პროცედურის ჩატარება გულისხმობს ამა თუ იმ ტიპის ტენდერის შეზღუდული პროცედურის სახით ჩატარებას.

ტენდერის ტიპებისათვის გთხოვთ იხილოთ ჩვენი განმარტებები მაღლა.


რა მიმდინარეობის სტატუსები გააჩნია ტენდერს?

Etenders.ge-ზე ინტეგრირებული სტატუსები ემსახურება ტენდერის მოწესრიგებულ მიმდინარეობას და სისტემაში გარკვეული ქმედებების დაშვებას/არ დაშვებას. ყოველ ტენდერს შესაბამისი სტატუსი ენიჭება ავტომატურად, თქვენს მიერ ტენდერის გამოცხადებისას მითითებული დროების შესაბამისად.

სტატუსი „გამოცხადებულია“ ტენდერს ენიჭება ტენდერის გამოცხადებისთანავე. აღნიშნული სტატუსის განმავლობაში პოტენციურ მიმწოდებლებს აქვთ შესაძლებლობა, გაეცნონ სატენდერო პირობებს. სატენდერო წინადადებების წარდგენა ამ სტატუსის განმავლობაში შეუძლებელია. ტენდერის მიმდინარეობის ამ ეტაპზე შემსყიდველს შეუძლია განახორციელოს სატენდერო განცხადებისა და დოკუმენტაციის ცვლილება და, საჭიროების შემთხვევაში, ტენდერის შეწყვეტაც. სტატუსის განმავლობაში სისტემაში ჩართულია კითხვა–პასუხის მოდული, რომელიც იძლევა შემსყიდველსა და პოტენციურ (სიტემაში რეგისტრირებულ) მიმწოდებლებს შორის კომუნიკაციის საშუალებას (მაგალითად სატენდერო განაცხადის დეტალებთან დაკავშირებული კითხვა-პასუხი). კითხვა–პასუხის მოდულის გამოყენებისას სისტემა უზრუნველყოფს კითხვის ავტორის ანონიმურობას. 

სტატუსზე „წინადადებების მიღება დაწყებულია“ მიმწოდებლებს ეძლევათ საშუალება, სისტემაში ატვირთონ მათი სატენდერო წინადადებები.– აღნიშნულ სტატუსზე გადასვლისთანავე რეგისტრირებული მომხმარებლებისათვის სისტემაში ჩნდება ღილაკი „განაცხადის გაკეთება“. აღნიშნულ ღილაკზე დაჭერით, დაინტერესებული კომპანიების მხრიდან ხორციელდება წინადადების სისტემაში ატვირთვა. ცხადია, წინადადებების წარდგენისათვის განკუთვნილი დროის ამოწურვამდე თქვენ არაერთხელ შეგიძლიათ შეცვალოთ თქვენი წინადადება (ღილაკი "რედაქტირება"). სურვილის შემთხვევაში, თქვენ გაქვთ განაცხადის გაუქმების შესაძლებლობაც.

სტატუსზე "წინადადებების მიღება დაწყებულია" გადასვლისთანავე, შემსყიდველი ორგანიზაციისათვის შეუძლებელი ხდება სატენდერო განცხადებისა და დოკუმენტაციის ცვლილება. აღნიშნული სტატუსის განმავლობაში სისტემაში ისევე როგორც წინა სტატუსის შემთხვევაში ჩართულია კითხვა–პასუხის მოდული.

სტატუსი „მიმდინარეობს ვაჭრობა“ ტენდერს ენიჭება მხოლოდ რევერსული აუქციონის შემთხვევაში. ელექტრონული ვაჭრობა იწყება ავტომატურად, სატენდერო წინადადებების მიღების პერიოდის დასრულებისთანავე - ტენდერის დეტალების გვერდი ავტომატურად გადავა ვაჭრობის გვერდზე. სატენდერო წინადადებების დასასრულის/ელექტრონული ვაჭრობის დაწყების დროის მომენტის არჩევა ხორციელდება შემსყიდველის მიერ რევერსული აუქციონის გამოცხადებისას, რაც, ცხადია, წინასწარ მითითებულია ტენდერის დეტალებში.

სტატუსი „დასრულებული“ წარმოადგენს ტენდერის საბოლოო სტატუსს, რომელიც ენიჭება ტენდერს ავტომატურად მას შემდეგ, რაც ამოიწურება სატენდერო წინადადებების მიღებისათვის განსაზღვრული დროის პერიოდი და ელექტრონულ ტენდერში წარდგენილია არანაკლებ ერთი წინადადება. რევერსული აუქციონის შემთხვევაში, სტატუსი „დასრულებული“ ტენდერს ენიჭება ელექტრონული ვაჭრობის დასრულებისთანავე.

საბოლოო სტატუსს განეკუთვნება ასევე სტატუსი „ტენდერი არ შედგა“. განსხვავება „დასრულებულს“ და „არ შემდგარს“ შორის მდგომარეობს იმაში, რომ ტენდერს ენიჭება სტატუსი „არ შედგა“ იმ შემთხვევაში, თუ ტენდერში მონაწილეობა არ მიუღია არც ერთ პრეტენდენტს.

ტენდერს მიენიჭება სტატუსი „შეწყვეტილი“ იმ შემთხვევაში, თუ შემსყიდველი განახორციელებს ტენდერის შეწყვეტას, რაც, როგორც ზემოთ აღინიშნა, შესაძლებელია მხოლოდ ტენდერის მიმდინარეობის ეტაპზე "გამოცხადებულია".


არის თუ არა შესაძლებელი, ტენდერის დასრულების შემდეგ, პრეტენდენტებთან კომუნიკაცია სისტემის საშუალებით?

ელექტრონული ტენდერების შემთხვევაში ეს შესაძლებელია. 

ამისათვის სისტემაში ჩაშენებულია ეგრეთწოდებული კომუნიკაციის მოდული, რომელიც იძლევა, როგორც მარტივი მიწერ-მოწერის (ჩატი), ასევე ფაილის გადაგზავნის/მიღების საშუალებას. როგორც კომუნიკაციის ინიცირებას (მოდულის ჩართვას), ასევე კომუნიკაციის დასრულებას ახდენს შემსყიდველი. დასრულებულ კომუნიკაციაზე, მიმწოდებელს არ აქვს მოდულის გამოყენების შესაძლებლობა.


რა ინფორმაცია არქივირდება სისტემაში, რა ვადით და სად ვიხილავთ არქივირებულ ინფორმაციას?

განცხადების გამოქვეყნების შემთხვევაში, სისტემაში მოხდება განცხადების დეტალების და თანდართული დოკუმენტების არქივირება.

ნებისმიერი ტიპის ელექტრონული ტენდერის შემთხვევაში, სისტემაში მოხდება არა მხოლოდ სატენდერო განცხადებისა და დოკუმენტაციის, არამედ სისტემურად მიღებული სატენდერო წინადადებებისა და წინადადების წარდგენის შემდეგ პრეტენდენტებთან განხორციელებული კომუნიკაციის არქივირება არანაკლებ ხუთი წლის ვადით. არქივირებული ინფორმაცია ხელმისაწვდომია შესაბამისი ტენდერის დეტალებში და შესაბამისი მომხმარებლისთვის ხელმისაწვდომია (კომპიუტერის და ინტერნეტის გამოყენებით) ნებისმიერ დროს ნებისმიერი ადგილიდან.


როგორ ხდება ტენდერში მონაწილეობის მიღება?

ტენდერში წინადადების წარდგენის გზა დამოკიდებულია იმაზე, თუ რა ტიპის ტენდერში გსურთ მონაწილეობის მიღება. 

იმ შემთხვევაში, თუ ტენდერი გამოცხადებულია განცხადების სახით, წინადადების წარდგენა ხორციელდება Etenders.ge-ს გვერდის ავლით (შემსყიდველის სურვილიდან გამომდინარე). ამიტომ, განცხადების შემთხვევაში, როგორც წესი, სატენდერო პირობებში მითითებულია თუ რა ფორმით უნდა გაკეთდეს შეთავაზებები (როგორც წესი, ელექტრონული ფოსტით, ან კონვერტების ოფისში მიტანით).

ელექტრონულ ტენდერში მონაწილეობის მისაღებად, საჭიროა, დარეგისტრირდეთ Etenders.ge–ზე (თუ ჯერ არ ხარ რეგისტრირებული) და თქვენი ელ. ფოსტის და პაროლის მითითებით შეხვიდეთ სისტემაში. ტენდერის მიმდინარეობის სტატუსზე "წინადადების მიღება დაწყებულია", ტენდერის დეტალებში, ღილაკ "მონაწილეობის მიღება"–ზე დაჭერით თქვენ იხდით წინადადების წარდგენის საფასურს, რის შემდეგ ფაილების სახით სისტემაში ტვირთავთ და აგზავნით თქვენს სატენდერო წინადადებას. წინადადებების მიღების დასრულებამდე თქვენი წინადადება ხილვადია მხოლოდ თქვენთვის.
 
მანამ, სანამ ტენდერში დასრულდება წინადადებების წარდგენა, თქვენ გაქვთ შესაძლებლობა, შეცვალოთ ის არაერთხელ, რაც არ საჭიროებს თქვენი მხრიდან დამატებითი ხარჯების გაღებას. სატენდერო წინადადების შეცვლისათვის გადადით ტენდერის დეტალებში და დააჭირეთ ღილაკს „რედაქტირება“. 

ღილაკ „განაცხადის გაუქმება“–ზე დაჭერით, თქვენი სატენდერო წინადადება წაიშლება სისტემიდან. გაითვალისწინეთ, რომ განაცხადის გაუქმების შემთხვევაში თქვენ არ გიბრუნდებათ თქვენს მიერ გადახდილი წინადადების წარდგენის საფასური.


როგორ ხდება გამოცხადების/მონაწილეობის საფასურის გადახდა?

როგორც ტენდერის გამოცხადების, ასევე ტენდერში მონაწილეობის მიღების საფასურის გადახდა შესაძლებელია ოფისიდან გაუსვლელად, სისტემაში ინტეგრირებული ონლაინ გადახდების მოდულის საშუალებით, ბანკის ბარათის გამოყენებით.

იმ შემთხვევაში, თუ თქვენ არ გაქვთ ბანკის ბარათი, გთხოვთ დაგვიკავშირდეთ, იმისათვის რათა თქვენ მოგეცეთ სისტემაში ოპერირების საშუალება გადახდის მოდულის გამოყენების გარეშე. ასეთ შემთხვევაში თქვენს მიერ გადახდების წარმოება განხორციელდება ჩვენს მიერ გადმოგზავნილი ინვოისის საფუძველზე.

სისტემით სარგებლობის რა ტარიფები მოქმედებს?

ვებსაიტზე მოქმედებს შემდეგი ფასები:

ნებისმიერი ტიპის ტენდერის გამოცხადება - 50 ლარი. 
ელექტრონულ ტენდერში წინადადების (შეთავაზების) წარდგენა - 50 ლარი.

ასევე, წინადადებების წარსადგენად, მომხმარებელს ეძლევა საშუალება ისარეგებლოს პერიოდული პაკეტებით ქვემოთ მოცემული ტარიფების შესაბამისად. პაკეტის მოქმედების ვადის განმავლობაში მომხამრებლებს საშუალება ექნებათ წარადგინონ ნებისმიერი რაოდენობის წინადადება.
- წინადადებების წარდგენის სამ თვიანი აბონემენტი - 180 ლარი;
-  წინადადებების წარდგენის ექვს თვიანი აბონემენტი - 300 ლარი;
- წინადადებების წარდგენის თორმეტ თვიანი აბონემენტი - 500 ლარი.

პაკეტის შესაძენად გთხოვთ დაგვიკავშირდეთ:

ტელ: 514 108801
ელ. ფოსტა: info@etenders.ge 


მომხმარებლის სახელმძღვანელო



სისტემის მართვის ინსტრუქცია.pdf